Sami vefur Sýslumanna, bara betri
Allar fyrirspurnir og erindi höfðu verið skráð um nokkurt skeið og því mikilvæg gögn til staðar. Heimsóknatölfræði var einnig skoðuð á plausible.io/island.is.
Flestar fyrirspurnir voru varðandi skírteini og vottorð, svo sá málaflokkur var skoðaður í samvinnu við starfsfólk Sýslumanna.
Við rýndum í mögulegar ástæður fyrir algengustu fyrirspurnunum og hversu mörgum þeirra var í raun svarað á vefnum. Skoðaðar voru ástæður fyrir óþarfa erindum, sumsé þegar fólk hafði samband í stað þess að finna sjálft upplýsingar sem voru til staðar.
Við breyttum flokkun efnisins, lagfærðum leiðakerfið og bættum við flýtileiðum á forsíðu. Við gerðum einnig síðutitla aðgerðamiðaðri og meira lýsandi, leiðbeiningatexta skýrari með breyttri forgangsröðun, styttri málsgreinum, fleiri millifyrirsögnum og orðanotkun sem endurspeglar orðaforða notenda.
Það sem var gert:
- Greining á erindum í afgreiðslu.
- Greining á heimsóknatölfræði.
- Textaefni og leiðakerfi breytt til móts við gögnin.
- Prófun á nýrri flokkun leiðakerfis.
- Ný ásýnd Sýslumanna sett fram með nýju myndefni og nýjum flekum á forsíðu.
Tree test - leiðakerfisprófun
Við gerðum að lokum svokallaða Tree-test prófun á nýju leiðakerfi. Fjórtán algengar notendaþarfir voru prófaðar með tóli sem kallast UXtweak, til að sjá hvernig notendum gekk að finna efnið í nýja leiðakerfinu. Niðurstöður rýndar.
Að lokum var ásýnd Sýslumanna sett fram með nýrri hausmynd og nýjum skrautmyndum á forsíðu.